اسلام آباد: صدرِ مملکت آصف علی زرداری ،وزیراعظم شہبازشریف اور دیگر سیاسی اور مذہبی جماعتوں کے قائدین اور رہنماوں نے بنوں میں سکیورٹی چیک پوسٹ پر حملوں کی شدید مذمت کرتے ہوئے ملک میں دہشتگردی کی لعنت کے مکمل خاتمے کے عزم کا اعادہ کیا ہے ۔
صدرِ مملکت نے بنوں میں خوارج دہشتگردوں کے حملے میں 12 جوانوں کے جاں بحق ہونے پر اِظہارِ افسوس کیا اور دفاعِ وطن میں جان کا نذرانہ پیش کرنے پر پاک فوج کے جوانوں کو خراج عقیدت پیش کیا۔
انہوں نے کہا ہے کہ پوری قوم مادرِ وطن کی سلامتی کیلئے جامِ شہادت نوش کرنے والوں کو سلام پیش کرتی ہے۔
آصف زرداری نے دہشتگردی کی لعنت کے مکمل خاتمے کے عزم کا اعادہ کرتے ہوئے دہشتگردی کے واقعے میں شہید جوانوں کے لیے بلندیٔ درجات کی دعا کی ۔
وزیراعظم محمد شہباز شریف نے بھی ضلع بنوں کے علاقے ملی خیل میں سکیورٹی فورسز اور فرنٹیئر کانسٹیبلری کے جوانوں کی شہادت پر رنج و الم کا اظہار کیا ہے ۔
دوسری جانب وزیراعظم شہبازشریف نے کہا کہ سکیورٹی فورسز نے 6 خوارج کو جہنم واصل کیا اور اس عمل میں اپنی جانوں کا نذرانہ پیش کیا، قوم کے بیٹوں کی قربانیاں ہرگز رائیگاں نہیں جانے دیں گے۔
انہوں نے کہا کہ عوام کی جان و مال کو خطرے میں ڈالنے والے دہشتگردوں کو بہت سخت قیمت ادا کرنی پڑے گی، ملک سے دہشتگردی کے مکمل خاتمے تک ہماری دہشتگردوں کے خلاف جنگ جاری رہے گی۔
گورنر فیصل کریم کنڈی اور وزیراعلیٰ خیبرپختونخوا علی امین گنڈاپور سمیت دیگر سیاسی جماعتوں کے قائدین اور رہنماوں نے بھی بنوں میں دہشتگردی کے واقعے کی مذمت کی ہے ۔
