کوئٹہ: وزیراعلیٰ بلوچستان میر سرفراز بگٹی نے کہا ہے کہ منشیات کے خلاف جنگ میں حکومت بلوچستان کی زیرو ٹالرنس پالیسی ہے۔
وزیراعلیٰ نے کہا کہ نوجوان نسل کو منشیات کے ناسور سے محفوظ بنانا اولین ترجیح ہے۔
میر سرفراز بگٹی نے کہا کہ گزشتہ دو برس کے دوران بلوچستان میں 133 ارب روپے سے زائد مالیت کی منشیات ضبط اور تلف کی گئی۔
وزیراعلیٰ کے مطابق کارروائیوں کے دوران 1,638 کلوگرام آئس (کرسٹل) اور 620 کلوگرام چرس قبضے میں لے کر تلف کی گئی۔
بلوچستان میں گزشتہ دو برس کے دوران 27 ہزار سے زائد غیر ملکی شراب و بیئر کی بوتلیں اور کین بھی قبضے میں لے کر تلف کیے گئے۔
میر سرفراز بگٹی نے کہا کہ منشیات کے خلاف کارروائیاں حکومت کے اس پختہ عزم کا اظہار ہیں کہ نوجوان نسل کو منشیات سے محفوظ رکھا جائے گا۔
منشیات کے خاتمے کیلئے قانون نافذ کرنے والے اداروں کی کارروائیاں مزید مؤثر بنائی جائیں گی۔
وزیراعلیٰ بلوچستان نے کہا کہ منشیات سے پاک بلوچستان ہماری اولین ترجیح ہے۔
وزیراعلیٰ نے کہا کہ صوبے میں نوجوان نسل کے محفوظ مستقبل کے لیے حکومت اپنی کوششیں جاری رکھے گی۔
