سٹیٹ ڈیزاسٹر مینجمنٹ اتھارٹی آزاد کشمیر نے حالیہ مون سون کی بارشوں اور سیلابی صورتحال سے ہونے والے نقصانات کی تفصیلات جاری کردیں، رپورٹ کے مطابق اس دوران 27 افراد جاں بحق اور 29 زخمی ہوئے ، 169 سکولوں اور 1809 گھروں کو نقصان پہنچا ہے ۔
مظفرآباد: ایس ڈی ایم اے کی رپورٹ کے مطابق آزاد جموں و کشمیر میں مون سون بارشوں کے دوران اب تک 27 افراد جاں بحق ہوئے، 29 افراد زخمی ہوئے ہیں ۔
رپورٹ میں کہا گیا ہے کہ مٹی کے تودے گرنے اور ندی نالوں میں طغیانی سے اب تک 303 گھر مکمل تباہ ہوگے، 1809 گھروں کو جزوی نقصان پہنچا ہے، 59 دکانیں تباہ، 237 مویشی ہلاک ، 17 پن چکیاں بھی نالوں میں بہہ گئیں ۔
ندی نالوں میں طغیانی سے 15 گاڑیاں بھی سیلابی ریلوں میں بہہ گئیں، مختلف علاقوں میں 33 رابطہ پل بھی سیلابی ریلوں میں بہہ گے، 169 سکولوں کو نقصان پہنچا ہے، 2 سو کلومیٹر سڑکوں کو بھی نقصان کا سامنا رہا ۔
ایس ڈی ایم اے کے مطابق آزاد جموں و کشمیر کے مختلف علاقوں میں مطلع صاف ہوگیا، صبح اور شام کے اوقات میں موسم خوشگوار رہنے لگا ہے، بالائی علاقوں کے ساتھ ساتھ زیریں علاقوں میں بھی گرمی کا زور ٹوٹنے لگا ہے ۔
