آئی ایس پی آر کی جانب سے جاری بیان کے مطابق سکیورٹی فورسز نے ضلع بنوں کے علاقے جانی خیل، ضلع شمالی وزیرستان اور جنوبی وزیرستان میں 25 اور 26 دسمبر کو دہشت گردوں کی موجودگی کی خفیہ اطلاعات پر آپریشنز کئے ۔
آئی ایس پی آر نے بتایا کہ سکیورٹی فورسز کی جانب سے آپریشنز کے دوران دہشت گردوں کے ساتھ فائرنگ کا شدید تبادلہ ہوا، ضلع بنوں کے علاقے جانی خیل میں 2 دہشت گردوں کو ہلاک کیا گیا ۔
ضلع شمالی وزیرستان میں کارروائی کے دوران 5 دہشت گرد ہلاک جبکہ 8 زخمی ہوگئے، ضلع جنوبی وزیرستان میں تیسری کارروائی کے دوران 6 دہشت گرد ہلاک جبکہ 8 زخمی ہوئے ۔
ترجمان پاک فوج نے بتایا کہ دہشت گردوں کیساتھ شدید فائرنگ کے تبادلے میں میجر محمد اویس بہادری سے لڑتے ہوئے شہید ہوگئے ۔
آئی ایس پی آر کا مزید کہنا تھا کہ علاقے میں کسی بھی دہشت گرد کے خاتمے کے لیے کلیئرنس آپریشن جاری ہے، سکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں، ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں ۔
