لاہور: وزیر اعلیٰ پنجاب مریم نواز شریف نے کہا ہے کہ معلومات تک رسائی شفاف طرز حکمرانی، عوامی اعتماد اور بہتر فیصلہ سازی کے لیے ناگزیر ہے۔
وزیر اعلیٰ پنجاب مریم نواز شریف نے یہ پیغام معلومات تک عالمگیر رسائی کے عالمی دن پر دیا۔
ان کا کہنا تھا کہ درست اور بروقت معلومات عوام کو بااختیار، حکومت پر اعتماد اور فیصلہ سازی کو شفاف بناتی ہیں۔
معلومات تک رسائی عوام اور حکومت کے درمیان اعتماد کو مزید مضبوط بناتی ہے۔
وزیر اعلیٰ پنجاب نے کہا کہ حکومت پنجاب شفافیت، احتساب اور شہریوں کے معلومات حاصل کرنے کے بنیادی حق کی مکمل پاسداری کرتی ہے۔
حکومت کے امور میں شفافیت اور اداروں کو عوام کے سامنے جوابدہ بنانا اولین ترجیح ہے۔
انہوں نے کہا کہ شہریوں کا درست اور بروقت معلومات تک رسائی کا حق جمہوریت اور بہتر معاشرے کی بنیاد ہے۔
آزاد اور شفاف معلومات کے ذریعے بدعنوانی کا مؤثر انداز میں خاتمہ کیا جا سکتا ہے۔
مریم نواز شریف کا کہنا تھا کہ شفافیت، جوابدہی اور گڈ گورننس کے لیے معلومات تک آسان رسائی ناگزیر ہے۔
جدید ٹیکنالوجی کے ذریعے عوام کو سرکاری معلومات تک فوری اور آسان رسائی فراہم کی جا رہی ہے۔
انہوں نے کہا کہ حکومت پنجاب عوامی سہولت، شفافیت اور میرٹ کو یقینی بنانے کے لیے عملی اقدامات کر رہی ہے۔
ڈیجیٹل پنجاب کا مقصد شہریوں کو معلومات اور سرکاری خدمات ان کی دہلیز تک پہنچانا ہے اور باخبر شہری ہی بہتر فیصلے اور مضبوط معاشرہ تشکیل دے سکتے ہیں۔
