بنوں: فتنہ الخوارج کے دہشتگردوں کا بنوں میں کنگر پل چوکی پر حملہ ناکام ہوگیا.
بنوں پولیس کی بروقت اور فوری کارروائی سے 4 خوارج جہنم واصل ہوگئے۔
خوارج نے نصف شب چوکی کنگر پل پر بزدلانہ حملہ کیا، بیدار پولیس اہلکاروں نے دفاعی حکمت عملی کے تحت موثر جواب دیا۔
حملے کی اطلاع پر تازہ دم دستوں کی کمک، کوئیک رسپانس فورس اور سی ٹی ڈی نے جائے وقوعہ پہنچ کر کلیئرنس آپریشن کیا۔
آپریشن کے دوران 4 خوارج کی لاشیں ملیں، اسلحہ و ایمونیشن بھی برآمد ہوا، لاشوں کی شناخت کی جا رہی ہے۔
تفصیلات کے مطابق نصف شب مسلح دہشت گردوں نے جدید ہتھیاروں سے لیس ہو کر پولیس چوکی کنگر پل پر اچانک حملہ کیا.
چوکی پر تعینات مستعد پولیس اہلکاروں نے انتہائی جرات اور پیشہ ورانہ مہارت کا مظاہرہ کرتے ہوئے بروقت اور مؤثر جوابی کارروائی کی اور حملے کو مکمل طور پر ناکام بنا دیا۔
حملے کی اطلاع ملتے ہی بنوں پولیس لائنز سے کوئیک رسپانس فورس، ریپڈ رسپانس فورس اور اضافی پولیس نفری فوری طور پر جائے وقوعہ پر پہنچ گئی اور پورے علاقے کو گھیرے میں لے لیا۔
بعد ازاں علاقے میں کلیئرنس اور سرچ آپریشن کیا گیا، جس کے دوران چار ہلاک دہشت گردوں کی لاشیں برآمد ہوئیں.
دہشت گردوں کے قبضے سے چار کلاشنکوفیں، متعدد میگزین، بھاری مقدار میں گولہ بارود، دستی بم اور بندولیئرز بھی برآمد کر لیے گئے۔
ہلاک ہونے والے دہشت گردوں کی شناخت کا عمل جاری ہے۔
انسپکٹر جنرل آف پولیس خیبرپختونخوا ذوالفقار حمید نے خوارج کے بزدلانہ حملے کا بروقت و فوری جواب دینے پر بنوں پولیس کی تعریف کی۔
آئی جی نے کہا کہ رات کی تاریکی میں دہشتگردوں کے بزدلانہ حملے کو کامیابی سے پسپا کرنا ہمارے جوانوں کی اعلیٰ تربیت و جانبازی کا ثبوت ہے۔
دہشتگردوں کے لیے خیبرپختونخوا کی سرزمین پر کوئی جگہ نہیں، خاتمہ یقینی بنائیں گے۔
