انگلینڈ نے پہلے ٹیسٹ میچ میں پاکستان کو ایک اننگز اور 103 رنز سے ہراکر تین میچوں کی سیریز میں ایک صفر کی برتری حاصل کر لی، انگلینڈ کی پہلی اننگز کے سکور 409 رنز کے جواب میں پاکستان دوسری اننگز میں 135 رنز پر آؤٹ ہو گیا اور میچ ہار گیا، شاندار بولنگ پر انگلینڈ کے اولی رابنسن کو میچ کا بہترین کھلاڑی قرار دیا گیا ۔
لیڈز کرکٹ گراؤنڈ میں پاکستان اور انگلینڈ کے درمیان پہلے ٹیسٹ کا فیصلہ میچ کے تیسرے دن ہوا، جہاں میزبان ٹیم نے ایک اننگز اور 103 رنز پر پاکستانی ٹیم کو شکست دی ۔
پاکستان کی پہلی اننگز کے سکور 171 رنز کے جواب میں انگلینڈ کی ٹیم پہلی اننگز میں 409 رنز پر آؤٹ ہو گئی تھی اور پاکستان کے خلاف 238 رنز کی برتری حاصل کی تھی ۔
میچ کے تیسرے دن پاکستان دوسری اننگز میں صرف 135 رنز پر آؤٹ ہو گیا، اور ایک اننگز اور 103 رنز سے میچ ہار گیا، جس کے ساتھ انگلینڈ کو تین میچوں کی سیریز میں ایک صفر کی برتری بھی حاصل ہو گئی ہے ۔
قومی ٹیم میں سب سے زیادہ محمد رضوان نے 41 اور شان مسعود نے 29 رنز بنائے، جبکہ عبداللہ شفیق 15، سعود شکیل 14، آذان اویس 9، امام الحق 0، کپتان سلمان آغا 4 اور علی عثمان 7 رنز پر آؤٹ ہوئے ۔
انگلینڈ کی طرف سے اولی رابنسن نے 3 وکٹیں حاصل کیں اور مجموعی طور پر میچ میں 8 وکٹیں حاصل کرنے پر میچ کا بہترین کھلاڑی قرار دیا گیا ۔
دونوں ٹیموں کے درمیان دوسرا ٹیسٹ میچ 27 اگست کو اور تیسرا اور آخری میچ 9 ستمبر کو کھیلا جائے گا ۔
