ملک بھر میں مون سون بارشوں کا سلسلہ جاری ہے، جس کے باعث موسم خوشگوار ہو گیا ہے۔ محکمہ موسمیات کے مطابق آئندہ پانچ روز تک ملک کے مختلف علاقوں میں وقفے وقفے سے بارش کا امکان ہے۔
محکمہ موسمیات کا کہنا ہے کہ ملک کے بالائی علاقے مغربی ہواؤں کے زیرِ اثر ہیں۔ خیبرپختونخوا کے ملاکنڈ اور ہزارہ ڈویژنز میں بارش ریکارڈ کی گئی، جبکہ مردان، چارسدہ، صوابی، پشاور، جنوبی اضلاع اور قبائلی علاقوں میں تیز ہواؤں اور گرج چمک کے ساتھ بارش ہوئی۔ متعلقہ اداروں کو لینڈ سلائیڈنگ اور دیگر ممکنہ حادثات سے نمٹنے کے لیے الرٹ رہنے کی ہدایت کی گئی ہے۔
اسلام آباد، راولپنڈی، مری اور پوٹھوہار کے بیشتر علاقوں میں بھی بارش ہوئی، جبکہ شمالی اور جنوبی بلوچستان، آزاد کشمیر اور گلگت بلتستان میں بھی مون سون کی بارشوں کے باعث موسم مزید ٹھنڈا ہو گیا ہے۔ پی ڈی ایم اے نے بارشوں کے دوران ندی نالوں میں سیلابی صورتحال کے خدشے کے پیشِ نظر شہریوں کو احتیاط برتنے کی ہدایت کی ہے۔
دوسری جانب بارشوں کے باوجود ملک کے بعض علاقوں میں گرمی برقرار ہے۔ تربت 49 ڈگری سینٹی گریڈ کے ساتھ ملک کا گرم ترین شہر رہا، جبکہ سبی میں 44، دادو میں 45 اور بہاولپور میں 41 ڈگری سینٹی گریڈ درجہ حرارت ریکارڈ کیا گیا۔ خیبرپختونخوا میں ڈیرہ اسماعیل خان 39، بنوں، پشاور اور چترال 37 ڈگری سینٹی گریڈ رہے، جبکہ مالم جبہ، مری اور راولاکوٹ میں کم سے کم درجہ حرارت 23 ڈگری سینٹی گریڈ ریکارڈ کیا گیا۔
بارش کی مقدار کے لحاظ سے اٹک میں سب سے زیادہ 75 ملی میٹر بارش ریکارڈ کی گئی، جبکہ سیالکوٹ میں 67 اور جوہرآباد میں 56 ملی میٹر بارش ہوئی۔
