تہران: ایران کے صدر ڈاکٹر مسعود پزشکیان نے کہا ہے کہ امریکہ۔ایران کے درمیان مفاہمتی یادداشت کی تمام شقیں ایرانی عوام کے مفاد میں ہیں۔
ایرانی میڈیا کے مطابق تہران میں ایک تقریب سے خطاب کرتے ہوئے صدر پزشکیان نے کہا کہ ایران نے حالیہ چند روز کے دوران 16 ملین بیرل تیل برآمد کیا ہے.
ایرانی صدر کا کہنا تھا کہ ان مذاکرات کی وجہ سے ہم اپنے وسائل تک رسائی حاصل کر سکیں گے۔
انہوں نے کہا کہ اس مختصر عرصے میں ہم بہت سے اقدامات کرنے میں کامیاب رہے ہیں۔
آج سے مذاکرات کے آغاز کے ساتھ ہی ہمارے قطر میں موجود 6 ارب ڈالر ہمیں واپس کر دیے جائیں گے۔
ایرانی صدرنے کہا کہ تہران بارہا یہ کہہ چکا ہے کہ وہ کبھی بھی جوہری بم بنانے کی کوشش نہیں کرے گا۔
انہوں نے مزید کہا کہ اسرائیل ایران اور امریکہ کے درمیان مذاکرات سے ناخوش ہے، وہ نہیں چاہتا کہ خطے میں امن بحال ہو۔
