اسلام آباد: وفاقی وزیر تجارت جام کمال خان سے امریکی ناظم الامور نٹالی اے بیکر کی ملاقات ہوئی.
ملاقات میں دوطرفہ تجارت، سرمایہ کاری اور اقتصادی تعاون بڑھانے پر تبادلہ خیال کیا گیا۔
سیکرٹری تجارت کے مطابق پاکستان امریکہ تجارتی معاہدے پر مذاکرات میں اہم پیش رفت ہوئی ہے۔
ملاقات میں پاکستانی آم اور بلوچستان کی کھجور کو امریکی منڈی تک رسائی، زرعی مصنوعات کی برآمدات، معدنیات اور صنعتی شعبے میں سرمایہ کاری پر بھی گفتگو ہوئی۔
اس موقع پر وفاقی وزیر تجارت نے امریکی کمپنیوں کو پاکستان کے زرعی اور صنعتی شعبوں میں سرمایہ کاری کی دعوت دی۔
دونوں ممالک نے تجارتی مذاکرات آگے بڑھانے، مارکیٹ تک رسائی کے مسائل حل کرنے اور اقتصادی تعاون مضبوط بنانے پر اتفاق کیا۔
