پشاور (خصوصی رپورٹر) خیبر ٹیلی ویژن نیٹ ورک کے دونوں چینلز "خیبر” اور "کے ٹو” کے ناظرین طویل عرصے سے رزاق خان کو بطور اداکار، ڈائریکٹر، پروڈیوسر اور اینکر دیکھتے آ رہے ہیں، تاہم اب وہ "کے ٹو” چینل پر "چاند میاں” کے اسٹاک کردار میں بھی بے حد مقبول ہو چکے ہیں۔
مختلف شوز میں عارف محمود قاصی، ردا عمران، نوشین اور مشی خان کے ساتھ شرکت کے دوران رزاق خان ہزارہ جاتی، پوٹھوہاری اور پنڈی کی ہندکو زبانوں میں ماہیے اور ٹپے پیش کرتے ہیں، جنہیں ناظرین کی جانب سے بے حد پسند کیا جا رہا ہے۔
لائیو پروگرامز میں کالرز انہیں "چاند میاں” کے نام سے مخاطب کرتے ہیں اور ان سے خصوصی طور پر ماہیوں اور ٹپوں کی فرمائش کرتے ہیں، جو ان کی بڑھتی ہوئی مقبولیت کا واضح ثبوت ہے۔
بلاشبہ رزاق خان ایک ہمہ جہت اور باصلاحیت فنکار ہیں، جو اپنی منفرد صلاحیتوں کے باعث ناظرین کے دل جیت رہے ہیں۔
