گلگت (ندیم خان ) گلگت بلتستان کے ضلع نگر کے علاقے چلھت شینبر میں باراتیوں کی گاڑی دریا میں جا گری ، جاں بحق افراد کا تعلق ایک ہی خاندان سے ہے ،ٹریفک حادثے میں دولہا سمیت 6 افراد جاں بحق اور ایک زخمی ہو گیا ۔
ریسکیو حکام کی جانب سے جاری بیان میں کہا گیا ہے کہ لاپتہ باراتیوں کی تلاش کیلئے مقامی رضاکاروں کے ساتھ سرچ آپریشن جاری ہے ۔
ریسکیو حکام کا مزید کہنا ہے کہ باراتیوں کی گاڑی میں ڈرائیور سمیت 7 افراد سوار تھے ۔
نمائندہ ’’کے ٹو ‘‘ ندیم خان کے مطابق حادثے میں جاں بحق افراد میں غلام عباس،شیر باز علی اور زوہیب شامل ہیں جبکہ لاپتہ ہونے والوں میں ڈرائیور محمد حسین ولد علی محمد ،شرافت حسین ولد شیرباز اور علیم ولد میر باز شامل ہیں جن کی تلاش کیلئے ریسکیو آپریشن جاری ہے ۔
نمائندہ کے مطابق جاں بحق اور لاپتہ ہونے والے تمام افراد کا تعلق چھلت بالا سے ہے جبکہ زخمی ہونے والے کی شناخت کاشف حسین ولد شیرباز کے نام سے ہوئی اور ان کا تعلق بھی چھلت بالا ہے ۔
دوسری جانب وزیر اعلیٰ گلگت بلتستان حاجی گلبر خان نے حادثے پر افسوس کا اظہار کرتے ہوئے نوٹس لیا ہے اور سیکرٹری داخلہ سمیت تمام متعلقہ اداروں کو ہدایت جاری کی ہے کہ وہ لاپتہ افراد کی تلاش میں تمام وسائل کو بروئے کار لائیں ۔
ترجمان فیض اللّٰہ فراق نے کہا کہ رات کے پچھلے پہر شادی کی تقریب سے واپس آتے ہوئے ایک گاڑی دریا میں گری جس میں 7 افراد سوار تھے ، وزیر اعلی کی ہدایت پر ریسکیو کی ٹیمیں جائے وقوعہ پہنچ چکی ہیں جہاں ایک مسافر کو زخمی حالت میں ہسپتال منتقل کیا جا چکا ہے ۔
انہوں نے کہا کہ 3 لاشیں بھی نکالی گئی ہیں ، 3 لاپتہ افراد کی تلاش جاری ہے ، وزیر اعلیٰ گلگت بلتستان نے تمام متعلقہ اداروں کو لاپتہ افراد کی تلاش کے عمل میں تیزی لانے کی ہدایت کی ہے ۔
