بھارتی ٹینس ٹیم کی پاکستان کے خلاف میچ سے قبل پریکٹس سیشن , میزبان ٹیم کے کھلاڑیوں نے مقابلے کی تیاری کیلئے دو گھنٹے بھرپور پریکٹس کی۔
تین اور چار فروری کو اسلام آباد میں شیڈول پاک بھارت ڈیوس کپ ٹائی کیلئے دونوں ممالک کے کھلاڑیوں نے کمر کس لی ہے۔بھارتی ٹینس ٹیم کو سخت سیکیورٹی میں مقامی ہوٹل سے پاکستان اسپورٹس بورڈ پہنچایا گیا جہاں بھارت اور پاکستان کی ٹیموں نے روشن کمپلیکس میں الگ الگ دو۔ دو گھنٹے تک گراس کورٹ پر پریکٹس سیشنز کیے۔اس دوران دونوں ٹیموں کے کھلاڑیوں اور آفیشلز نے خوشگوار موڈ کے ساتھ ایک دوسرے سے ملاقات بھی کی۔ ڈیوس کپ ٹائی کیلئے روشن کمپلیکس میں میڈیا اور تماشائیوں کیلیے انکلوژرز بنائے جارہے ہیں جبکہ خصوصی پاسز کے تحت شائقین پاک بھارت ٹینس ٹاکرے سے لطف اندوز ہوں گے۔
دوسری جانب پاکستانی ٹینس کھلاڑی عقیل خان نے کہا ہے کہ بھارت کے خلاف کھیلنا دلچسپ ہوتا ہے لیکن دباؤ بھی ہوتا ہے۔ بھارتی کھلاڑیوں سے ملاقات اکثر ہوتی رہتی ہے۔ 90 فیصد بھارتی کھلاڑیوں کی گیم کو جانتا ہوں۔ بھارت کو گراس کورٹ پر کھیلنے کا طریقہ آتا ہے۔پاکستان کی اسٹرینتھ بھی گراس کورٹ ہے۔بھارت کیخلاف اپنی بہترین ٹینس کھیلیں گے۔
