بنگلا دیش نے پاکستان کو سلہٹ ٹیسٹ میں بھی ہرا کر دو ٹیسٹ میچوں کی سیریز میں وائٹ واش کر دیا، 437 رنز ہدف کے تعاقب میں قومی ٹیم میچ کے آخری روز 358 رنز بناکر آوٹ ہو گئی، قومی ٹیم کو میچ میں 78 رنز سے شکست کا سامنا کرنا پڑا ۔
پاکستان اور بنگلا دیش کے درمیان سلہٹ کے مقام پر کھیلے گئے دوسرے ٹیسٹ میچ کے آخری دن بنگلا دیش کو جیت کیلئے 3 وکٹیں جبکہ پاکستان کو کامیابی کیلئے 121 رنز کی ضرورت تھی ۔
میچ کے 5 ویں دن پاکستان ٹیم 437 رنز کے ہدف کے تعاقب 358 بنا کر آؤٹ ہوگئی اور اس طرح بنگلادیش نے قومی ٹیم کو 78 رنز سے شکست دی ، جس کے ساتھ ہی بنگلا دیش نے پاکستان ٹیم کو دو ٹیسٹ میچوں کی سیریز میں کلین سوئپ کرتے ہوئے تاریخ رقم کرلی ۔
پاکستان کی جانب سے سب سے زیادہ محمد رضوان 94 رنز بنا کر پویلین لوٹے،ساجد خان 28 رنز بناکر آؤٹ ہوئے، خرم شہزاد بغیر کوئی رن بنائے آؤٹ ہوگئے ۔
عبداللّٰہ فضل 6، اذان اویس 21، بابر اعظم 47، سعود شکیل 6 ، کپتان شان مسعود، سلمان علی آغا 71، 71 جبکہ حسن علی بغیر کھاتہ کھولے آؤٹ ہوگئے ۔
بنگلہ دیش کی جانب سے تیج الاسلام 6، ناہید رانا 2، شریف الاسلام اور مہدی حسن مرزا نے ایک ایک کھلاڑی کو آوٹ کرکے ٹیم کی جیت میں اہم کردار ادا کیا ۔
اس سے قبل بنگلہ دیشی ٹیم اپنی دوسری اننگز میں 390 رنز بنا کر آؤٹ ہو گئی، اور پاکستان کو جیت کیلئے 437 رنز کا ہدف دیا، جس کے جواب میں قومی ٹیم دوسری اننگز میں 358 رنز بناکر آوٹ ہوئی اور قومی ٹیم کو 78 رنز سے شکست دے کر سیریز میں کلین سویپ کردیا ۔
بنگلہ دیش نے پہلی اننگز میں 278 رنز بنائے تھے جس کے جواب میں پاکستان ٹیم اپنی پہلی اننگز میں 232 رنز پر ڈھیر ہوگئی تھی جس کے باعث بنگلادیش کو 46 رنز کی برتری حاصل ہوگئی تھی ۔
بنگلہ دیش کے لیتن داس کو شاندار بیٹنگ پر میچ اور مشفیق الرحیم کو دونوں میچز میں شاندار بیٹنگ پر سیریز کا بہترین کھلاڑی قرار دیا گیا ۔
