پی ایس ایل 9 کی تمام ٹیموں کے کھلاڑیوں نے پریکٹس شروع کردی جبکہ ٹریفک ایڈوائزری پلان تیار کر لیا گیا۔
اسلام آباد یونائیٹڈ ،پشاور زلمی ،لاہورکلندر،کراچی کنگز ،کوئٹہ گلیڈی ایٹر سمیت ملتان سلطان کے کھلاڑیوں نے بولنگ،بیٹنگ ،اور فیلڈنگ سیشن شروع کردیئے ہیں۔تمام ٹیمیں جیت کیلئے پرعزم ہیں۔لاہور کا قذافی اسٹیڈیم 9میچز کی میزبانی کرے گا۔ سیکیورٹی کے پیش نظر اسٹیڈیم کے داخلی اور خارجی راستے اور نشترپارک اسپورٹس کمپلیکس میں موجود تمام ریسٹورنٹس بند کردیئے گئے ہیں۔
چیف ٹریفک آفیسر لاہور کے مطابق 4ایس پیز، 12ڈی ایس پیز اور 90انسپکٹرز پی ایس ایل کے دوران فرائض سرانجام دیں گے جبکہ قذافی سٹیڈیم، ٹیموں کے روٹس اور متبادل راستوں پر 900سے زائد وارڈنز تعینات ہوں گے۔جبکہ رانگ پارکنگ کے خاتمے کیلئے 20فورک لفٹرز، 5بریک ڈانز بھی تعینات ہوں گے۔
شائقین کرکٹ کی سہولت اور باآسانی سٹیڈیم تک رسائی کیلئے 3پارکنگ سٹینڈز مختص کیے گئے ہیں۔سی ٹی او لاہور کے مطابق مال روڈ، کینال روڈ، جیل روڈ، مین بلیوارڈ روڈ گلبرگ ٹریفک کیلئے کھلی رہیں گی۔ میچ کے دوران کسی بھی روڈ کو ٹریفک کیلئے بند نہیں رکھا جائے گا۔ ٹیم کی موومنٹ کے دوران مخصوص روڈز کو کچھ لمحوں کے لئے بند کیا جائے گا۔موومنٹ گزرتے ہی تمام ڈائیورشن کو ٹریفک کے لئے کھول دیا جائے گا۔
