سکیورٹی وجوہات کے پیش نظر اسلام آباد میں مختلف اوقات میں ٹریفک ڈائیورشن پلان ترتیب دیا گیا ہے جب کہ متعدد راستے ہر قسم کی آمدورفت کے لیے بند کر دیے گئے ہیں۔
ترجمان اسلام آباد پولیس کے مطابق مری روڈ اور کلب روڈ سے ریڈزون تک ٹریفک کے لئے ڈائیوشنز ہیں۔ ان شاہراوں پر تمام پبلک ٹرانسپورٹ کا داخلہ بند ہے۔ ٹرانسپورٹرز سے گزارش ہے کہ وہ بس سٹاپس یا لوپس پر کھڑے نہ ہوں۔ ریڈ زون اور توسیعی ریڈ زون کو مکمل طور پر بند کر دیا گیا ہے۔ کشمیر چوک سے کلب روڈ بذریعہ زیرو پوائنٹ سری نگر ہائی وے، سری نگر ہائی وے زیرو پوائنٹ سے سرینا چوک، شکر پڑیاں روڈ چاند تارہ چوک سے سیونتھ ایونیو، جناح ایونیو خیابان چوک سے بلیو ایریا اور فیصل چوک سے ٹریل 3 تک مارگلہ روڈ ٹریفک کے لیے بند ہیں۔
شہریوں سے اپیل کی گئی ہے کہ وہ غیر ضروری سفر سے گریز کریں اور قانون نافذ کرنے والے اداروں کے ساتھ مکمل تعاون کریں۔ شہریوں کو ہدایت کی گئی ہے کہ وہ ٹریفک اپ ڈیٹس کے لیے اسلام آباد ٹریفک پولیس کے واٹس ایپ چینل اور سوشل میڈیا پیجز سے رہنمائی حاصل کریں۔
