صوبائی وزیر زراعت سید عاشق کرمانی نے چکوال میں بارانی ایگریکلچر انسٹیٹیوٹ میں منصوبے کی باقاعدہ لانچنگ کی اور میڈیا سے گفتگو کرتے ہوئے کہا کہ یہ پروگرام بارانی علاقوں میں پیداوار بڑھانے، پانی کے مؤثر استعمال اور کاشت کاروں کی آمدن میں اضافے کا سبب بنے گا
صوبائی وزیر کے مطابق منصوبے کے تحت پانی کے مؤثر اور باکفایت استعمال کا جامع پروگرام شروع کیا جا رہا ہے۔ کاشت کاروں کو مونگ پھلی کے 25 ہزار کلو گرام معیاری بیج فراہم کیے جائیں گے، جبکہ 4 ہزار 500 ایکڑ رقبے کی اصلاح بلڈوزرز کے ذریعے کی جائے گی تاکہ قابلِ کاشت زمین میں اضافہ ہو سکے۔
انہوں نے بتایا کہ 3 ہزار 625 ایکڑ رقبے پر زیتون کے نئے باغات لگائے جائیں گے اور زیتون کے فروغ کے لیے 100 ایکڑ پر جدید طریقۂ کاشت متعارف کرایا جائے گا۔ زیتون کا تیل نکالنے کے لیے چار کولڈ پریس یونٹس بھی فراہم کیے جائیں گے تاکہ مقامی سطح پر ویلیو ایڈیشن کو فروغ مل سکے۔منصوبے کے تحت 400 منی ڈیمز تعمیر کیے جائیں گے ۔ جنگلی جانوروں سے فصلوں کے تحفظ کے لیے 2 ہزار 790 کنال رقبے پر باڑ بھی نصب کی جائے گی۔
منصوبے میں تازہ پھلوں کی جدید اقسام بھی شامل کی گئی ہیں تاکہ خطہ پوٹھوہار کی زرعی معیشت کو مستحکم کیا جا سکے اور کسانوں کو جدید تقاضوں سے ہم آہنگ کیا جا سکے۔
