پولیس کے مطابق واقعہ پشاور روڈ پر قاسم آباد بازار کے قریب ایک گھر میں پیش آیا، جہاں فائرنگ کرنے والے تینوں ملزمان مقتولین کے قریبی عزیز ہیں۔
ابتدائی تفتیش کے مطابق ملزمان صوابی سے آئے تھے اور جرگے کے دوران تلخ کلامی پر فائرنگ کر دی۔
پولیس کا کہنا ہے کہ ملزمان کی شناخت شہزاد، ساجد اور مزمل مشتاق کے ناموں سے ہوئی ہے۔ دو ملزمان مقتول حسین عرف بادشاہ کے بہنوئی جبکہ ایک ملزم اس کی دوسری بیوی کا کزن ہے۔
بظاہر فائرنگ رشتے کے تنازع پر کی گئی۔جاں بحق ہونے والوں میں حسین عرف بادشاہ اور اس کی دو بیویاں نور اور ندا شامل ہیں۔
ریسکیو حکام کے مطابق ابتدائی طور پر دو افراد موقع پر جاں بحق ہوئے جبکہ تیسرا شدید زخمی تھا، جو بعد ازاں دم توڑ گیا۔ لاشوں کو قانونی کارروائی کے بعد ڈی ایچ کیو اسپتال منتقل کر دیا گیا۔
پولیس کے مطابق مقتول حسین عرف بادشاہ ڈیڑھ سے دو ماہ قبل کرائے کے مکان میں منتقل ہوا تھا اور منڈی میں کام کرتا تھا۔ وہ لکڑی سے مختلف اشیاء بنانے کا کام بھی کرتا رہا۔ اس نے چند ہفتے قبل ندا سے دوسری شادی کی تھی۔ مقتول کی ایک بیٹی شادی شدہ ہے جبکہ دو کم عمر بیٹیاں اور دو کمسن بیٹے بھی ہیں۔پولیس نے واقعے کی تحقیقات شروع کر دی ہیں اور ملزمان کی گرفتاری کے لیے کارروائی جاری ہے۔
