وزیر اعظم محمد شہباز شریف نے کہا ہے کہ موقع ہے ہم مل کر ملکی معیشت کو مزید بہتر کریں، معیشت کی ترقی سے متعلق جامع پروگرام کا اعلان جلد ہوگا ۔
اسلام آباد: وفاقی کابینہ کی صدارت کرتے ہوئے وزیراعظم شہبازشریف کا شرکا سے کہنا تھا کہ پالیسی ریٹ میں کمی سرمایہ کاروں کے لیے خوش آئند ہے، پالیسی ریٹ میں کمی سے معیشت کو تقویت ملے گی، سرمایہ کاری بڑھے گی ۔
وزیر اعظم نے کہا کہ ملک میں پولیو کے متاثرہ بچوں میں اضافہ بد قسمتی ہے، پوری دنیا میں پولیو کا خاتمہ ہو چکا ہے، پاکستان میں پولیو کے خاتمے میں رکاوٹیں قابل افسوس ہیں ۔
انہوں نے کہا کہ انسانی سمگلنگ ایک بڑا چیلنج ہے، ماضی میں انسانی سمگلنگ کی روک تھام کیلئے کیے جانے والے فیصلوں کی روشنی میں آئندہ کی حکمت عملی طے کریں گے ۔
اجلاس کے دوران وزیر اعظم نے کرک میں انسداد پولیو ٹیم کی سکیورٹی پر مامور پولیس اہلکار کی شہادت پر فاتحہ خوانی کرائی، لیگی رہنما صدیق الفاروق مرحوم کی مغفرت کیلئے بھی دعا کی گئی ۔
