ایبٹ آباد سے افسوسناک خبر سامنے آئی ہے جہاں گاؤں لنگڑیال میں مکان کی دیوار گرنے کے نتیجے میں دو کمسن بچیاں جاں بحق جبکہ تین افراد زخمی ہو گئے ۔
ایبٹ آباد: پولیس کے مطابق حادثہ اس وقت پیش آیا جب اچانک مکان کی دیوار منہدم ہو گئی اور ملبہ گھر کے افراد پر آ گرا۔ جاں بحق ہونے والی بچیوں کی شناخت 14 سالہ نایاب اور 10 سالہ فاطمہ کے نام سے ہوئی ہے جو آپس میں حقیقی بہنیں تھیں ۔
واقعے میں بچیوں کے والدین اور ایک بہن بھی زخمی ہوئے ہیں جنہیں فوری طور پر طبی امداد کے لیے قریبی ہسپتال منتقل کر دیا گیا،ریسکیو کارروائی میں مقامی افراد اور پولیس نے حصہ لیا اور ملبے تلے دبے افراد کو نکالا ۔
حادثے کے بعد علاقے میں سوگ کی فضا قائم ہو گئی جبکہ اہل خانہ پر غم کے بادل چھا گئے ہیں، پولیس کے مطابق واقعے کی مزید تحقیقات جاری ہیں ۔
