مانسہرہ میں سوشل میڈیا کی خلاف ورزیوں پر سخت ایکشن، خواتین اہلکاروں سمیت 15 پولیس اہلکاروں کو شوکاز نوٹس جاری کردیا گیا ، ایک ہفتے میں جواب طلب کرلیا گیا ۔
مانسہرہ( امان اللہ امجد) سوشل میڈیا بالخصوص ٹک ٹاک پر پولیس یونیفارم میں ویڈیوز اپلوڈ کرنے پر محکمانہ پابندی کے باوجود خلاف ورزی کرنے والے 15 سے زائد پولیس اہلکاروں بشمول خواتین اہلکاروں کے خلاف کارروائی عمل میں لائی گئی ہے ۔
ڈی پی او مانسہرہ محمد اظہرخان نے متعلقہ اہلکاروں کو شوکاز نوٹس جاری کرتے ہوئے 7 دن کے اندر وضاحت جمع کروانے کی ہدایت جاری کر دی ہے ۔
بعد ازاں غیر تسلی بخش جواب کی صورت میں تمام متعلقہ اہلکاروں کے خلاف سخت محکمانہ کارروائی عمل میں لائی جائے گی ۔
ڈی پی او آفس میں قائم سوشل میڈیا مانیٹرنگ سیل اور آئی ٹی سٹاف مزید پولیس اہلکاروں کے سوشل میڈیا اکاؤنٹس کی نگرانی کر رہا ہے، جبکہ متعلقہ اہلکاروں کی فہرستیں بھی مرتب کی جا رہی ہیں ۔
