راولپنڈی کے مری روڈ پر ٹریفک اہلکار کو کچلنے کی کوشش کر کے فرار ہونے والے نوجوان کار سوار کو تھانہ نیو ٹاؤن پولیس نے گرفتار کرلیا۔
ملک تیمور احمد نامی شخص مستقل طور حضرو اٹک کا رہائشی ہے لیکن اسلام آباد میں پرائیویٹ نوکری کرتا ہے۔ 12 نومبر کو سٹی ٹریفک پولیس اہلکار محمد ضمیر نے ون وے کی خلاف ورزی پر کار سوار روک کر کاغذات طلب کیے تو اس نے اپنی گاڑی بھگا دی تھی ۔
کار سوار نے ٹریفک پولیس اہلکار محمد ضمیر کو کچلنے کی کوشش کی اور روکنے پر گاڑی کے ساتھ گھسیٹتے ہوئے چوک تک ساتھ لے گیا۔ اس واقعے کی فوٹیج بھی وائرل ہوئی تھی۔
تھانہ نیوٹاؤن پولیس نے نامعلوم کار سوار کے خلاف اقدام قتل وغیرہ کی دفعات کے تحت مقدمہ درج کیا تھا۔ ملزم کو گاڑی کے کوائف کے ذریعے ٹریس کرکے گرفتار کرلیا گیا ہے۔
