شدید گرمی کے بعد خیبرپختونخوا، اسلام آباد اور ملک کے مختلف علاقوں میں بارش سے موسم خوشگوار ہو گیا ہے، جبکہ محکمہ موسمیات نے پیشگوئی کی ہے کہ بارشوں کا موجودہ سلسلہ 30 جولائی تک جاری رہ سکتا ہے۔ پی ڈی ایم اے نے ممکنہ ہنگامی صورتحال کے پیش نظر متعلقہ اداروں کو الرٹ رہنے کی ہدایت جاری کر دی ہے۔
محکمہ موسمیات کے مطابق آئندہ 24 گھنٹوں کے دوران خیبرپختونخوا، اسلام آباد، بالائی پنجاب، کشمیر اور گلگت بلتستان میں بارش کا امکان ہے، جبکہ ملک کے بیشتر علاقوں میں موسم گرم اور حبس برقرار رہنے کی توقع ہے۔
رپورٹ کے مطابق ملاکنڈ، ہزارہ، پشاور، صوابی، مردان، کوہاٹ، کرک، بنوں اور وزیرستان سمیت خیبرپختونخوا کے مختلف اضلاع میں بارش کی پیشگوئی کی گئی ہے۔ بعض مقامات پر تیز بارش اور گرج چمک کے ساتھ موسلا دھار بارش بھی متوقع ہے۔
اس سے قبل پی ڈی ایم اے خیبرپختونخوا نے 30 جولائی تک موسمی الرٹ جاری کرتے ہوئے نشیبی علاقوں میں شہری سیلاب، پہاڑی علاقوں میں لینڈ سلائیڈنگ اور گلیشیئر پھٹنے کے خدشات ظاہر کیے ہیں۔ ادارے نے ضلعی انتظامیہ اور امدادی اداروں کو ممکنہ صورتحال سے نمٹنے کے لیے پیشگی انتظامات مکمل رکھنے کی ہدایت کی ہے۔
