اسلام آباد: وزیراعظم محمد شہباز شریف کی وزیر اعلیٰ گلگت بلتستان امجد حسین سے خصوصی ملاقات۔
وزیراعظم محمد شہباز شریف نے کہا ہے کہ وفاقی حکومت گلگت بلتستان کے عوام کی فلاح و بہبود کے لیے نو منتخب حکومت کے ساتھ مل کر کام کرنے کے لیے پُرعزم ہے۔
وزیراعظم نے امجد حسین کو وزیر اعلیٰ گلگت بلتستان کا عہدہ سنبھالنے پر مبارکباد پیش کی۔
ملاقات میں وزیر اعلیٰ گلگت بلتستان اور وزیراعظم کے درمیان گلگت بلتستان کے امور پر تبادلہ خیال کیا گیا۔
وزیراعظم نے کہا کہ وفاقی حکومت گلگت بلتستان کی فلاح و بہبود کے لیے قابلِ تجدید توانائی، سیاحت، انفراسٹرکچر، صحت، تعلیم اور دیگر شعبوں میں ترقیاتی منصوبوں پر اقدامات کر رہی ہے۔
وفاقی حکومت کے منصوبوں میں 100 میگاواٹ شمسی توانائی کا منصوبہ اور دانش سکولوں کے قیام کے منصوبے سرفہرست ہیں۔
وزیراعظم نے کہا کہ وفاقی حکومت گلگت بلتستان کے عوام کی سہولت کے لیے گلگت میں پاکستان آسان خدمت سینٹر قائم کرنے کی منصوبہ بندی کر رہی ہے۔
ملاقات میں نائب وزیراعظم و وزیر خارجہ محمد اسحاق ڈار، وزیر منصوبہ بندی احسن اقبال اور وزیر اقتصادی امور احد خان چیمہ بھی موجود تھے۔
