دوحہ: وزیراعظم محمد شہباز شریف اور سابق وزیراعظم میاں محمد نواز شریف نے امیرِ قطر شیخ تمیم بن حمد آل ثانی سے دوحہ میں ملاقات کی۔
انہوں نےامیرِ قطر سے ان کے والد سابق امیر شیخ حمد بن خلیفہ آل ثانی کے انتقال پر تعزیت کا اظہار کیا۔
نائب وزیراعظم محمد اسحاق ڈار، وفاقی وزیر اطلاعات عطاء اللہ تارڑ اور اعلیٰ حکام بھی وزیرِ اعظم کے ہمراہ تھے۔
وزیراعظم محمد شہباز شریف اور پاکستانی وفد نے حکومت اور عوم کی طرف سے قطر کی قیادت اور عوام سے تعزیت کی۔
وزیراعظم محمد شہباز شریف نےامیرِ قطر کے والد کی دوراندیش قیادت، مدبرانہ بصیرت اور قطر کی غیرمعمولی ترقی کے ساتھ ساتھ خطے میں امن، استحکام اور ترقی کے فروغ کے لئے ان کی گراں قدر خدمات کو زبردست خراجِ عقیدت پیش کیا۔
وزیراعظم نے پاکستان کے لئے مرحوم کی گرمجوشی، شفقت اور دیرینہ محبت کو خراجِ تحسین پیش کرتے ہوئے ان کے پاکستان کے متعدد یادگار دوروں کو بھی قدر و منزلت سے یاد کیا۔
وزیراعظم نے گہرے صدمے کی گھڑی میں قطر کی قیادت اور عوام کے ساتھ پاکستان کی غیرمتزلزل یکجہتی کا اعادہ کیا۔
انہوں نے دعا کی کہ اللہ تعالیٰ مرحوم کو جنت الفردوس میں اعلیٰ مقام عطا فرمائے اور قطری شاہی خاندان اور قطر کی برادر عوامِ کو یہ ناقابلِ تلافی صدمہ صبر و حوصلے کے ساتھ برداشت کرنے کی توفیق عطا فرمائے۔
امیرِ قطر نے وزیراعظم محمد شہباز شریف، سابق وزیراعظم میاں محمد نواز شریف، نائب وزیراعظم سینیٹر محمد اسحاق ڈار اور پاکستانی وفد کا ذاتی طور پر دوحہ میں تعزیت کرنے پر شکریہ ادا کیا.
امیرِ قطر نے اس جذبے کو دونوں برادر ممالک اور عوام کے درمیان گہرے برادرانہ تعلقات کا مظہر قرار دیا۔
