بالاکوٹ میں 2005 کے ہولناک زلزلے کے دوران لاپتہ ہونے والے 4سال کے بچے کی باقیات برآمد ہوئی ہیں، شہید بچے کے والد کے مطابق بچے کی باقیات تعمیراتی کام کے دوران ملبے سے برآمد ہوئی ہیں ۔
مانسہرہ: شہید بچے کے والد قاری شفیق الرحمن کے مطابق ان کا چار سالہ بیٹا جمال شفیق 8 اکتوبر 2005کو آنے والے تباہ کن زلزلے کے دوران لاپتہ ہوگیا تھا، جس کی تلاش کے باوجود اس وقت اس کا کوئی سراغ نہیں مل سکا تھا ۔
انہوں نے بتایا کہ حالیہ دنوں مکان کی تعمیر کے دوران ملبے کے ڈھیر سے انسانی باقیات برآمد ہوئیں، جن کی شناخت بچے کے کپڑوں اور جوتوں کی بنیاد پر جمال شفیق کے طور پر کی گئی ۔
بچے کی باقیات ملنے کے بعد اہل خانہ پر غم کی کیفیت طاری ہوگئی، جبکہ اس واقعے نے 2005کے تباہ کن زلزلے کی دردناک یادیں بھی ایک بار پھر تازہ کر دیں ۔
