دفترِ خارجہ کی جانب سے جاری بیان کے مطابق نائب وزیراعظم اور وزیر خارجہ اسحاق ڈار اور شہزادہ فیصل بن فرحان نے امریکہ اور ایران کے درمیان جاری مذاکرات کے آخری مرحلے میں داخل ہونے کا خیرمقدم کیا ہے۔
بیان میں کہا گیا ہے کہ مشرقِ وسطیٰ میں امن و استحکام کے لیے جاری سفارتی کوششوں کے مثبت نتائج سامنے آ رہے ہیں اور فریقین کے درمیان ممکنہ معاہدہ خطے میں کشیدگی کے خاتمے کی جانب اہم پیش رفت ثابت ہو سکتا ہے۔
رپورٹس کے مطابق امریکہ اور ایران کے درمیان امن معاہدے پر آج دستخط ہونے کا امکان ہے۔ امریکی صدر ڈونلڈ ٹرمپ نے بھی اس حوالے سے امید ظاہر کرتے ہوئے کہا ہے کہ ایران کے ساتھ معاہدہ طے پانے کے بعد آبنائے ہرمز کو فوری طور پر بین الاقوامی بحری آمدورفت کے لیے کھول دیا جائے گا۔
تجزیہ کاروں کے مطابق اگر معاہدہ طے پا جاتا ہے تو اس سے نہ صرف خطے میں کشیدگی میں کمی آئے گی بلکہ عالمی تجارت اور توانائی کی ترسیل پر بھی مثبت اثرات مرتب ہوں گے۔ تاہم معاہدے کی حتمی تفصیلات اور اس کے باضابطہ اعلان کا انتظار کیا جا رہا ہے۔
