بنوں کی تحصیل ڈومیل کے علاقے اودین خیل میں زمین کے تنازع پر ہونے والی فائرنگ کے نتیجے میں چار افراد جاں بحق ہوگئے، جن میں ایک باپ اور اس کے دو بیٹے بھی شامل ہیں۔
پولیس کے مطابق دونوں فریقین کے درمیان زمین کے معاملے پر تنازع چل رہا تھا کہ اسی دوران ایک فریق نے دوسرے پر فائرنگ کر دی۔ فائرنگ کے نتیجے میں چار افراد موقع پر ہی جاں بحق ہوگئے۔
واقعے کے بعد جاں بحق افراد کی لاشوں کو آر ایچ اسپتال ڈومیل منتقل کر دیا گیا، جبکہ پولیس نے علاقے کو گھیرے میں لے کر شواہد اکٹھے کرنا شروع کر دیے ہیں۔
پولیس کا کہنا ہے کہ واقعے کی تحقیقات جاری ہیں اور ملزمان کی گرفتاری کے لیے مختلف مقامات پر چھاپے مارے جا رہے ہیں۔ واقعے کے بعد علاقے میں خوف و ہراس پھیل گیا ہے، جبکہ پولیس نے صورتحال کو قابو میں رکھنے کے لیے سیکیورٹی اقدامات مزید سخت کر دیے ہیں۔
