لندن: پاک فوج کی ٹیم نے برطانیہ میں منعقدہ بین الاقوامی فوجی مشق کیمبرین پٹرول 2026 میں چاندی کا تمغہ حاصل کر لیا۔
پاکستان ہائی کمیشن لندن کے مطابق برطانیہ میں پاکستان کے ہائی کمشنر ٹیپو عثمان نے سلور میڈل جیتنے والی پاک فوج کی ٹیم کی میزبانی کی۔
ہائی کمشنر نے کامیابی پر ٹیم کو مبارکباد دی۔ اس موقع پر مشق کے تجربات پر بھی تبادلہ خیال کیا گیا۔
کیمبرین پٹرول 2026 ویلز، برطانیہ میں 2 سے 13 اکتوبر تک منعقد ہوئی، جس میں 36 ممالک کی 140 ٹیموں نے حصہ لیا۔
پاکستان کی نمائندگی 59 پنجاب رجمنٹ کے ایک افسر اور 7 جوانوں پر مشتمل ٹیم نے کی۔
پاکستان ہائی کمیشن کے مطابق پاک فوج اس سے قبل 2022 اور 2023 میں سلور میڈل جبکہ 2024 اور 2025 میں گولڈ میڈل حاصل کر چکی ہے۔
حالیہ کامیابی کے ساتھ پاکستان نے مسلسل 5سال اس بین الاقوامی مشق میں تمغے جیتنے کا اعزاز برقرار رکھا ہے۔
ہائی کمیشن کے مطابق پاکستانی ٹیم کی کارکردگی پاک فوج کی پیشہ ورانہ مہارت، جسمانی استعداد اور تربیت کی عکاسی کرتی ہے۔
