آئل اینڈ گیس ڈویلپمنٹ کمپنی لمیٹیڈ (او جی ڈی سی ایل) نے خیبر پختونخوا کے ضلع کوہاٹ میں تیل اور گیس کے نئے بڑے ذخائر دریافت ہونے کا اعلان کیا ہے۔
او جی ڈی سی ایل کی جانب سے پاکستان سٹاک ایکسچینج کو بھیجے گئے نوٹس کے مطابق کمپنی نے کوہاٹ کے علاقے میں تیل و گیس کے نئے ذخائر دریافت کیے ہیں۔ نوٹس میں بتایا گیا ہے کہ یہ رواں سال دریافت ہونے والا سب سے بڑا ذخیرہ قرار دیا جا رہا ہے۔
کمپنی کے مطابق نئی دریافت سے ملک میں توانائی کے وسائل میں اضافہ ہوگا اور تیل و گیس کی مقامی پیداوار بڑھنے سے توانائی کے شعبے کو تقویت ملے گی۔
او جی ڈی سی ایل حکام کا کہنا ہے کہ دریافت ہونے والے ذخائر کی مزید تکنیکی جانچ اور پیداوار کے عمل سے متعلق اقدامات بھی جلد شروع کیے جائیں گے تاکہ ان وسائل کو جلد از جلد استعمال میں لایا جا سکے۔
