سیکیورٹی فورسز نے بلوچستان کے علاقے نوشکی میں کارروائی کرتے ہوئے 7 دہشت گردوں کو ہلاک کردیا،ہلاک دہشت گردوں کا تعلق بھارتی پراکسی فتنہ الہندوستان سے تھا، مارے گئے دہشتگردوں میں خود کش حملہ آور بھی شامل تھا، آپریشن کے دوران دہشت گردوں کا ٹھکانہ تباہ، گولہ بارود ضائع کر دیا گیا ۔
پاک فوج کے شعبہ تعلقات عامہ کی جانب سے جاری بیان کے مطابق ضلع نوشکی میں خفیہ اطلاع پر کامیاب کاروائی کی گئی جہاں فتنتہ الہندوستان سے تعلق رکھنے والے 7 دہشتگردوں کو ہلاک کیا گیا ۔
آئی ایس پی آر نے کہا کہ وفاقی ایپکس کمیٹی کے منظور کردہ قومی ایکشن پلان کے تحت “عزمِ استحکام” وژن کے مطابق انسداد دہشت گردی کی مہم پوری رفتار سے جاری رہے گی ۔
بیان کے مطابق پاکستان کی سکیورٹی فورسز اور قانون نافذ کرنے والے ادارے غیر ملکی سرپرستی میں ہونے والی دہشت گردی کے مکمل خاتمے تک اپنی کارروائیاں جاری رکھیں گے ۔
آئی ایس پی آر نے اپنے بیان کے اختتام پر اس عزم کا اعادہ کیا کہ وطن کے دفاع میں بہادر افسران اور جوانوں کی قربانیاں قوم کے حوصلے اور دہشت گردی کے خلاف سکیورٹی فورسز کے غیر متزلزل عزم کو مزید مضبوط بناتی ہیں ۔
