لاہور: وزیراعلیٰ پنجاب مریم نواز شریف نے عاشورہ محرم الحرام کے دوران بہترین انتظامات اور سخت سکیورٹی اقدامات یقینی بنانے کی ہدایت کی ہے۔
مریم نواز نے صوبہ بھر میں امن و امان برقرار رکھنے کے لیے جامع سکیورٹی پلان تشکیل دینے کا حکم دیا ہے۔
وزیراعلیٰ مریم نواز شریف نے سخت گرمی کے پیش نظر ٹھنڈے پانی اور مشروبات کی سبیلوں کا خصوصی انتظام کرنے کی ہدایت کی۔
انہوں نے ستھرا پنجاب پروگرام کے تحت مجالس اور جلوسوں کے راستوں پر پانی کا چھڑکاؤ یقینی بنانے کا بھی حکم دیا۔
مریم نواز شریف نے کہا کہ ریسکیو 1122، فیلڈ ہسپتال اور کلینکس آن ویلز کی 24 گھنٹے دستیابی یقینی بنائی جائے گی۔
انہوں نے بتایا کہ صوبہ بھر کی 4700 سے زائد امام بارگاہوں کو کیو آر کوڈ پینک بٹن کی سہولت فراہم کی جا رہی ہے، جس کے ذریعے کسی بھی ہنگامی صورتحال میں فوری اور بروقت امداد فراہم کی جا سکے گی۔
وزیراعلیٰ پنجاب نے کہا کہ عوام کی جان و مال کی حفاظت کو ہر صورت یقینی بنایا جائے گا۔
انہوں نے کہا کہ محرم الحرام ہمیں صبر، استقامت، محبت اور بھائی چارے کا درس دیتا ہے، جبکہ جلوسوں اور مجالس میں آنے والے عزاداروں کو محفوظ اور پُرسکون ماحول فراہم کیا جائے گا۔
مریم نواز شریف نے بتایا کہ صوبہ بھر میں ایک لاکھ 24 ہزار سے زائد پولیس اہلکار اور رینجرز کے 15 ہزار جوان محرم الحرام کے دوران سکیورٹی ڈیوٹی سرانجام دیں گے۔
