اسلام آباد :وفاقی وزیرداخلہ محسن نقوی کی ہدایت پر وزیر مملکت داخلہ طلال چوہدری نے ریڈ زون کا دورہ کیا۔ اس موقع پر چیف کمشنر، آئی جی، ڈپٹی کمشنر اسلام آباد اور دیگر اعلیٰ افسران بھی ان کے ہمراہ تھے۔
وزیر مملکت نے پارلیمنٹ ہاؤس، ڈپلومیٹک انکلیو اور ریڈ زون میں سیکیورٹی انتظامات کا تفصیلی جائزہ لیا اور ڈیوٹی پر تعینات افسران و اہلکاروں سے ملاقات کر کے انتظامات چیک کیے۔ انہوں نے بہترین فرائض انجام دینے پر جوانوں کی ستائش کی۔
علی ناصر رضوی نے وزیر مملکت کو مجموعی سیکیورٹی صورتحال پر بریفنگ دی۔ اس موقع پر طلال چوہدری نے کہا کہ اسلام آباد میں حالات مکمل طور پر نارمل اور پُرامن ہیں اور سرکاری و نجی ادارے معمول کے مطابق کھلے ہیں۔
انہوں نے کہا کہ شہریوں کے جان و مال کے تحفظ کے لیے تمام ضروری اقدامات یقینی بنائے جا رہے ہیں اور عوام سیکیورٹی فورسز سے مکمل تعاون کریں۔
