اسلام آباد: چیئرمین وزیراعظم یوتھ پروگرام رانا مشہود احمد خان نے کہا کہ نوجوان پاکستان کا روشن مستقبل اور قیمتی اثاثہ ہیں، انہیں معیاری تعلیم اور جدید ہنر فراہم کرنا حکومت کی اولین ترجیح ہے۔
اسلام آباد نیوٹیک میں منعقدہ تقریب سے خطاب کرتے ہوئے انہوں نے کہا کہ ہنر مند نوجوان بیرونِ ملک جا کر پاکستان کے سفیر کا کردار ادا کریں اورملک کا مثبت تشخص اجاگر کریں ۔یوتھ پروگرام کے تحت نوجوانوں کو جدید تقاضوں سے ہم آہنگ مہارتیں سکھائی جا رہی ہیں۔ انہوں نے کہا کہ وزیراعظم شہباز شریف عالمی سطح پر پاکستان کا مقدمہ مؤثر انداز میں پیش کر رہے ہیں۔
چیئرمین وزیراعظم یوتھ پروگرام نے کہا کہ بھارتی جارحیت کےبعد دنیا نے دیکھا کہ پاکستان اپنے دفاع کی بھرپور صلاحیت رکھتا ہے، اور مضبوط دفاع کے باعث عالمی برادری بھی پاکستان کی معترف ہے۔ انہوں نے کہا کہ افواجِ پاکستان اپنی جانوں کا نذرانہ پیش کر کے وطنِ عزیز کا دفاع کر رہی ہیں۔تقریب کے اختتام پر رانا مشہود احمد خان نے نمایاں کارکردگی دکھانے والے طلبہ میں اسناد اور شیلڈز تقسیم کیں۔
