جمعہ کو اوگھی کے کنڈا کڑی کے جنگلات میں آسمانی بجلی گرنے سے دو بھائیوں سمیت تین افراد جاں بحق ہوگئے۔
ریسکیو 1122 کے اہلکار امیر خادم نے بتایا کہ "واقعے کی اطلاع ملنے پر ہماری ٹیمیں جائے وقوعہ پر پہنچیں اور ہلاک شدگان کو اوگھی کے ہسپتال منتقل کر دیا”۔ مقامی لوگوں کے مطابق تینوں چرواہے اپنے ریوڑ اور بھیڑ بکریوں کی رہنمائی کر رہے تھے، آسمانی بجلی کی زد میں آکر موقع پر ہی دم توڑ گئے۔
ریسکیو 1122 کی ٹیموں نے لاشوں کو تحویل میں لے کر تحصیل ہیڈ کوارٹر ہسپتال اوگھی پہنچا دیا۔جاں بحق ہونے والوں کی شناخت بٹگرام سے تعلق رکھنے والے 28 سالہ محمد شفیق، اوگھی کے 40 سالہ احمد خان اور بٹگرام کے 10 سالہ محمد شکیل کے نام سے ہوئی ہے۔ طبی اور قانونی ضابطے کی تکمیل کے بعد میتیں ان کے لواحقین کے حوالے کر دی گئیں۔
