پشاور: وزیر اعلی علی امین گنڈاپور سے کرم کے معاملے پر قائم گرینڈ جرگے کے ممبران نے ملاقات کی ، ملاقات کے دوران کرم کے مسئلے کے حل کے لئے باضابطہ مذاکرات کے آغاز اور دیگر معاملات پر تبادلہ خیال ہوا ۔
وزیراعلیٰ ہاوس سے جاری اعلامیے کے مطابق جرگہ اراکین نے معاملے کے پرامن انداز میں حل کے لئے ہر ممکن کوششیں کرنے اور اس سلسلے میں صوبائی حکومت کو ہر مکمل تعاون فراہم کرنے کی یقین دہانی کی ۔جرگہ اراکین نے مسئلے کو جرگے کے ذریعے پر امن طریقے سے حل کرنے کے لئے وزیر اعلی کی کوشش کو سراہا۔
اعلامیے میں کہا گیا ہے کہ گرینڈ جرگہ اگلے چند دنوں میں کرم کا دورہ کرکے فریقین کے ساتھ بات چیت شروع کرے گا۔
وزیر اعلی نے معاملے کے حل کے لئے صوبائی حکومت کو اپنا تعاون فراہم کرنے پر جرگہ اراکین کا شکریہ ادا کیا اور کہا کہ صوبائی حکومت جرگہ اراکین کو علاقے میں جا کر مذاکرات کرنے کے لئے درکار تمام سہولیات اور سپورٹ فراہم کرے گی ۔
علی امین گنڈاپور کا کہنا تھا کہ امید ہے گرینڈ جرگے کا ذریعے کرم کے معاملے کا پر امن اور پائیدار حل نکل آئے گا۔
جرگہ اراکین میں سابق وفاقی وزیر پیر نورالحق قادری، سابق سینیٹر صالح شاہ، سابق سینیٹر سجاد خان، سابق وفاقی وزیر گلاب جمال، سابق گورنر خیبر پختونخوا انجینئر شوکت اللہ، سینیٹر عبدالرزاق اور دیگر شامل تھے، وزیر اعلی کے مشیر برائے اطلاعات بیرسٹر محمد علی سیف بھی اس موقع پر موجود تھے۔
