کراچی میں پاکستان رینجرز سندھ کے کیمپ پر دہشتگردوں نے حملہ کیا ہے ، سیکیورٹی اہلکاروں کی فوری کارروائی کے دوران 3 دہشتگردوں کو ہلاک اور ایک زخمی افغان دہشتگرد کو گرفتار کرلیا گیا، آئی ایس پی آر کے مطابق دہشتگردوں کے ساتھ فائرنگ کے تبادلے میں 3 سیکیورٹی اہلکار بھی شہید ہو گئے ۔
پاک فوج کے شعبہ تعلقات عامہ کی جانب سے جاری بیان کے مطابق بھارتی حمایت یافتہ جماعت الاحرار کے خوارج نے کیمپ کے مرکزی گیٹ پر دھماکے کے بعد اندر داخل ہونے کی کوشش کی ۔
سیکیورٹی اہلکاروں کی فوری کارروائی کے دوران 3 دہشتگردو ہلاک ہو گئے جبکہ ایک دہشتگرد کو گرفتار کیا گیا ہے ، گرفتار دہشتگرد کا تعلق افغانستان سے ہے ۔
آئی ایس پی آر نے بتایا کہ اس دوران دہشتگردوں کیساتھ فائرنگ کے تبادلے میں پاکستان رینجرز کے 3 جوان شہید اور 4 زخمی ہوگئے ۔
آئی ایس پی آر کا مزید کہنا ہے کہ علاقے میں کلیئرنس آپریشن جاری ہے، عزمِ استحکام وژن کے تحت دہشتگردی کے مکمل خاتمے تک کارروائیاں جاری رہیں گی ۔
دوسری جانب فیلڈ مارشل سید عاصم منیر نے شہداء کو خراجِ عقیدت پیش کیا ہے اور لواحقین سے دلی تعزیت کا اظہار کیا ہے، فیلڈ مارشل سید عاصم منیر نے کہا کہ قوم کی حفاظت کے لیے یہ قربانیاں ہمارے عزم کو مزید مضبوط بناتی ہیں ۔
دریں اثنا صدرِ مملکت آصف علی زرداری نے کہا ہے کہ دہشتگردی سے جنگ میں قوم اپنے بہادر سپاہیوں کی قربانیاں کبھی فراموش نہیں کرے گی، بیرونی سرپرستی میں سرگرم دہشتگرد عناصر کے مذموم عزائم کبھی کامیاب نہیں ہوں گے ۔
صدر زرداری نے کہا ہے کہ پاکستانی قوم دہشتگردی کے خلاف سیکیورٹی فورسز اور قانون نافذ کرنے والے اداروں کے شانہ بشانہ ہے، شہدا کی قربانیاں دہشتگردی کے مکمل خاتمے کے قومی عزم کو مزید مضبوط کرتی ہیں ۔
