تحریر: علی شیر: ۔
یہ تحریر ضلع استور حلقہ 02 میں سامنے منظر عام آنے والے ایک متنازع عمل پر عوام کے آگاہی کے لئے لکھ رہا ہوں، کہا یہ جاتا ہے کہ ایک محکمہ نے الیکشن کمیشن سے باقاعدہ این او سی حاصل کرکے چند ترقیاتی سکیموں کا اجراء کیا ان ترقیاتی سکیموں کا براہ راست تعلق سابق وزیر داخلہ شمس الحق لون سے ہے چونکہ یہ ان کے دور کی رکھی گئی سکیمیں تھی، جاری کردہ سکیموں پر ایک سیاسی جماعت کے امیدوار محمد فاروق رانا نے الیکشن کمیشن کو ایک تحریری درخواست دی جس کا متن یہ تھا کہ نگران حکومت میں سکیموں کا اجراء آئین کے منافی ہے اور یہ کہ اس عمل سے متعلقہ حلقے میں الیکشن عمل متاثر ہوسکتا ہے، اس درخواست کی بنیاد پر الیکشن کمیشن نے جاری کردہ این او سی کو معطل کردیا جس کی بنیاد پر سکیمیں بھی فی الوقت روک دی گئیں ۔
آئیے پہلے یہ جاننے کی کوشش کرتے ہیں کہ آئین کی روح سے کیا الیکشن کمیشن یا نگران حکومت کسی بھی حلقے میں ترقیاتی سکیموں کے اجراء کا حکمنامہ یا این او سی اجراء کا اختیار رکھتے ہیں یا نہیں؟
گلگت بلتستان میں نگران حکومت کے قیام کا مقصد آئینی طور پر صرف اور صرف آزاد، منصفانہ اور شفاف انتخابات کا انعقاد ہے، یہ مقصد نہ کوئی سیاسی نعرہ ہے اور نہ انتظامی سہولت، بلکہ ایک آئینی فریضہ ہے جس کی نگرانی براہِ راست الیکشن کمیشن پر عائد ہوتی ہے ۔
ایسے میں اگر نگران دور میں ترقیاتی سکیموں کے اجراء کے لیے الیکشن کمیشن این او سی جاری کرتا ہے تو یہ عمل آئین، عدالتی نظائر اور انتخابی ضابطۂ اخلاق، تینوں سے متصادم دکھائی دیتا ہے ۔
آئینِ پاکستان کا آرٹیکل (3)218 واضح طور پر الیکشن کمیشن کو پابند کرتا ہے کہ وہ انتخابات کا انعقاد ایمانداری، شفافیت اور غیر جانبداری کے ساتھ یقینی بنائے، سپریم کورٹ نے متعدد فیصلوں میں قرار دیا ہے کہ یہ شق محض رسمی ہدایت نہیں بلکہ ایک فعال آئینی ذمہ داری ہے ۔
مشہور مقدمہ Workers Party Case (PLD 2012 SC 681) میں عدالتِ عظمیٰ نے واضح کیا ہے کہ الیکشن کمیشن کا فرض صرف الیکشن کروانا نہیں بلکہ انتخابی عمل کو ہر قسم کے اثر و رسوخ، سرکاری مداخلت اور غیر منصفانہ برتری سے پاک رکھنا بھی ہے ۔
اسی تناظر میں نگران حکومت کے اختیارات ہمیشہ محدود تصور کیے گئے ہیں، سپریم کورٹ نے Mustafa Impex Case (PLD 2016 SC 808) سمیت دیگر فیصلوں میں اس اصول کو تقویت دی کہ عبوری یا نگران سیٹ اَپ کوئی ایسا فیصلہ نہیں کر سکتا جس کے دور رس سیاسی یا مالی اثرات ہوں ۔
ترقیاتی سکیموں کا اجراء بلاشبہ ایسا ہی اقدام ہے جس کے نتائج انتخابی سیاست پر براہِ راست مرتب ہوتے ہیں،الیکشن کمیشن آف پاکستان کا ضابطۂ اخلاق برائے انتخابات بھی اس حوالے سے دوٹوک ہیں ۔
ضابطہ کے مطابق: ۔
نگران حکومت کسی نئی ترقیاتی سکیم کا آغاز نہیں کر سکتی،
کسی ایسے اقدام کی اجازت نہیں دے سکتی جو ووٹرز کو متاثر کرے ،
اور ریاستی وسائل کو انتخابی فائدے کے لیے استعمال نہیں ہونے دے سکتی ،
اگر اس کے باوجود کسی سکیم کے لیے این او سی جاری کیا جائے تو یہ عمل محض انتظامی اجازت نہیں رہتا بلکہ ضابطۂ اخلاق کی کھلی خلاف ورزی بن جاتا ہے ۔
عدالتی نظائر یہ بھی بتاتے ہیں کہ انتخابی بے ضابطگی کو نیت کے بجائے اثر (effect) کی بنیاد پر جانچا جاتا ہے، سپریم کورٹ نے Air Marshal (R) Asghar Khan Case (PLD 2013 SC 1) میں قرار دیا کہ اگر ریاستی وسائل یا اختیارات انتخابی عمل پر اثرانداز ہوں تو وہ عمل غیر آئینی تصور ہوگا، چاہے اس کے پیچھے بدنیتی ثابت ہو یا نہ ہو ۔
گلگت بلتستان کے تناظر میں اگر کوئی ترقیاتی سکیم کسی مخصوص حلقے میں شروع ہوتی ہے، اور امیدوار اسے افتتاح، تشہیر یا کریڈٹ کی صورت میں اپنی مہم کا حصہ بناتا ہے، تو یہ Level Playing Field کے اصول کی صریح نفی ہے، ایسی صورت میں الیکشن کمیشن کی جانب سے این او سی کا اجرا خود ادارے کو قانونی سوالات کی زد میں لے آتا ہے ۔
قانون یہ اجازت صرف انتہائی ہنگامی اور ناگزیر معاملات میں دیتا ہے، جیسے قدرتی آفات یا انسانی جانوں کو فوری خطرات۔ اس کے علاوہ کسی بھی ترقیاتی سرگرمی کی اجازت دینا نہ صرف آئینی انحراف ہے بلکہ مستقبل میں انتخابی نتائج کو عدالت میں چیلنج کرنے کا جواز بھی فراہم کرتا ہے ۔
نتیجتاً یہ کہنا بے جا نہ ہوگا کہ نگران دور میں ترقیاتی سکیموں کے لیے این او سی جاری کرنا:
آرٹیکل (3) 218کی روح کے منافی
سپریم کورٹ کی تشریحات سے متصادم
اور انتخابی ضابطۂ اخلاق کی واضح خلاف ورزی ہے ۔
الیکشن کمیشن کو چاہیے کہ وہ ایسے تمام این او سی کا فوری ازسرِنو جائزہ لے، انہیں منسوخ کرے اور آئندہ آئین و عدلیہ کی واضح ہدایات کی روشنی میں فیصلے کرے، کیونکہ اگر آئینی ادارے ہی قانون کی حدود سے تجاوز کریں گے تو نقصان کسی ایک امیدوار یا جماعت کا نہیں بلکہ جمہوری نظام کے اعتماد کا ہوگا ۔
