گلگت — محکمہ موسمیات نے گلگت بلتستان کے مختلف علاقوں میں 17 مارچ سے 20 مارچ تک موسم سرد، ابر آلود اور بارش و برفباری کی پیشگوئی کی ہے۔
محکمہ موسمیات کے مطابق مغربی سسٹم کے داخل ہونے سے گلگت اور سکردو میں بادل چھائے رہیں گے اور ہلکی بارش کا امکان ہے، جبکہ ہنزہ اور دیگر بالائی علاقوں میں برفباری متوقع ہے۔ ان علاقوں میں درجہ حرارت نقطہ انجماد کے قریب رہنے کا امکان ظاہر کیا گیا ہے۔
بارش اور برفباری کے باعث خطے میں سردی کی شدت میں مزید اضافہ ہو سکتا ہے۔ حکام نے خبردار کیا ہے کہ پہاڑی علاقوں میں لینڈ سلائیڈنگ اور برفانی تودے گرنے کا بھی خدشہ ہے۔
انتظامیہ نے سیاحوں اور مسافروں کو ہدایت کی ہے کہ وہ غیر ضروری سفر سے گریز کریں اور احتیاطی تدابیر اختیار کریں۔ محکمہ موسمیات کے مطابق آئندہ چند روز تک گلگت بلتستان میں موسم سرد اور ابر آلود رہنے کا امکان ہے۔
