اسلام آباد پولیس کا جرائم پیشہ عناصر کے خلاف بڑا کریک ڈاؤن، شیخو گینگ کے 2 ارکان کوگرفتارکرلیا گیا، پولیس نے ملزمان سے وارداتوں میں استعمال ہونے والا اسلحہ بمعہ ایمونیشن بھی برآمد کرلیا ہے ۔
ترجمان اسلام آباد پولیس کے مطابق تھانہ کھنہ پولیس نے بینکوں سے رقم نکلوانے والے شہریوں کو لوٹنے کی متعدد وارداتوں میں ملوث خطرناک شیخو گینگ کے 2 ارکان کو گرفتار کرلیا ۔
پولیس کے مطابق گرفتار ملزمان کے قبضے سے لوٹی گئی 22 لاکھ روپے نقدی برآمد کرلی گئی ہے،پولیس نے ملزمان سے وارداتوں میں استعمال ہونے والا اسلحہ بمعہ ایمونیشن بھی برآمد کرلیا ہے ۔
ابتدائی تفتیش کے دوران انکشاف ہوا ہے کہ ملزمان جڑواں شہروں میں اسلحہ کے زور پر متعدد وارداتوں میں ملوث رہے ہیں، دورانِ واردات مزاحمت پر شہریوں کو زخمی کرنے سے بھی گریز نہیں کرتے تھے ۔
ڈی آئی جی اسلام آباد محمد جواد طارق نے کہا ہے کہ گرفتار ملزمان کو قرار واقعی سزا دلوانے کے لیے تمام قانونی تقاضے پورے کیے جائیں گے ۔
انہوں نے واضح کیا کہ شہریوں کو ان کے قیمتی اثاثوں سے محروم کرنے والوں کے خلاف بلا امتیاز کارروائیاں جاری رکھی جائیں گی ۔
