اسلام آباد: نائب وزیراعظم و وزیر خارجہ سینیٹر محمد اسحاق ڈار نے کہا ہے کہ سمندر میں برطانوی جہاز کی جانب سے ریسکیو کیے جانے والے آٹھ ایرانی ماہی گیروں کو بحفاظت ان کے وطن واپس بھجوا دیا گیا ہے۔
سماجی رابطے کی ویب سائٹ ایکس پر اپنے بیان میں اسحاق ڈار نے بتایا کہ برطانوی بحری جہاز MMA VALOUR نے ان ایرانی ماہی گیروں کو اس وقت بچایا تھا جب ان کی کشتی حادثے کا شکار ہو کر پھنس گئی تھی۔
انہوں نے کہا کہ تمام ماہی گیر کراچی سے آج صبح ایران روانہ ہو گئے ہیں۔
اسحاق ڈار نے مزید کہا کہ پاکستان کی وزارت خارجہ اور متعلقہ اداروں نے ایرانی اور برطانوی حکام کے ساتھ قریبی رابطہ رکھا تاکہ ماہی گیروں کی محفوظ منتقلی اور جلد وطن واپسی کو یقینی بنایا جا سکے۔
انہوں نے کہا کہ پاکستان اس معاملے میں اپنے ایرانی بھائیوں کی مدد اور ان کی بحفاظت واپسی کے لیے تمام فریقین کے تعاون کو سراہتا ہے۔
نائب وزیراعظم نے اس معاملے میں پاکستان پر اعتماد کرنے پر ایران اور ایرانی وزیر خارجہ عباس عراقچی کا بھی شکریہ ادا کیا۔
اسحاق ڈار نے کہا کہ تمام متعلقہ اداروں اور شراکت داروں کے تعاون سے ایرانی ماہی گیروں کی محفوظ واپسی ممکن ہوئی، جو پاکستان کے انسانی ہمدردی اور علاقائی تعاون کے عزم کا مظہر ہے۔
