پاکستان کی جانب سے خطے مٰن امن کے قیام کیلئے سفارتی کوششیں جاری ہیں ، اس سلسلے میں فیلڈ مارشل سید عاصم منیر اہم سرکاری دورے پر ایران کے شہر تہران پہنچ گئے، فیلڈ مارشل تہران میں اعلیٰ ایرانی حکام سے ملاقاتیں کریں گے ۔
پاک فوج کے شعبہ تعلقات عاملہ کی جانب سے جاری بیان کے مطابق فیلڈ مارشل سید عاصم منیر ایران کے اہم سرکاری دورے پر تہران پہنچ گئے ۔
آئی ایس پی آر نے بتایا کہ تہران پہنچنے پر وفاقی وزیر داخلہ محسن نقوی اور ایرانی حکام نے فیلڈ مارشل عاصم منیر کا استقبال کیا ۔
بیان میں کہا گیا ہے کہ فیلڈ مارشل تہران میں ایران کے اعلیٰ شخصیات سے اہم ملاقاتیں کریں گے،اس موقع پر ایران امریکہ کشیدگی کے خاتمے اور ممکنہ امن معاہدے پر تفصیلی بات چیت کی جائے گی ۔
آئی ایس پی آر کا مزید کہنا ہے کہ فیلڈ مارشل عاصم منیر کا ایران کا دورہ مشرق وسطیٰ میں امن کے قیام کیلئے ہے اور یہ ثالثی کی جاری کوششوں کا حصہ ہے ۔
یاد رہے کہ وفاقی وزیر داخلہ محسن نقوی بھی ایران میں موجود ہیں، محسن نقوی نے ایران کے وزیر خارجہ عباس عراقچی سے ملاقات کر کے خطے میں کشیدگی کم کرنے اور امریکا کے ساتھ جنگ کے خاتمے سے متعلق امور پر تفصیلی تبادلہ خیال کیا ۔
خبر ایجنسی کے مطابق وزیر داخلہ محسن نقوی نے ایرانی وزیر خارجہ عباس عراقچی سے ملاقات کر کے ایران امریکہ جنگ کے خاتمے کے لیے مسودوں پر تفصیلی بات چیت کی ۔
