فیصل آباد میں ایک شخص نے مالی پریشانیوں کی وجہ سے اپنی دو بیویوں اور چار بچوں کو قتل کرنے کے بعد خودکشی کر لی۔ واقعہ فیصل آباد کی گلشن مدینہ کالونی میں پیش آیا۔
پولیس رپورٹس کے مطابق اس شخص کی شناخت 50 سالہ کاظم جواد کے نام سے ہوئی، اس نے پہلے اپنی بیویوں کو گولی مار کر قتل کیا۔ اس کے بعد اس نے اپنے چار بچوں بشمول تین لڑکیوں اور ایک لڑکے کو قتل کیا پھر اس نے خود پر بندوق چلا لی۔
پولیس نے بتایا کہ کاظم نے کاروبار میں مسلسل خسارے اور بڑھتے ہوئے قرض کے بعد یہ انتہائی قدم اٹھایا۔ گولیوں کی آواز سن کر پڑوسیوں نے پولیس کو اطلاع دی۔ جائے وقوعہ پر پہنچ کر پولیس نے لاشوں کو تحویل میں لے کر پوسٹ مارٹم کے لیے اسپتال منتقل کردیا۔ فی الحال واقعے کی تحقیقات جاری ہے۔
