عید کی آمد کے پیش نظر ضلعی انتظامیہ متحرک، گرانفروشی کے خلاف کریک ڈاؤن تیز، متعدد قصاب گرفتار، دکانیں سیل کردی گئیں ۔
بٹگرام: صوبائی حکومت کی ہدایات اور عوامی شکایات پر ایڈیشنل اسسٹنٹ کمشنر اختر رسول نے گرانفروشی کے خلاف بھرپور کارروائی کرتے ہوئے مقررہ نرخ نامہ کی خلاف ورزی کرنے والے قصابوں کے خلاف کریک ڈاؤن کیا ۔
اس دوران ٹیسٹ پرچیز کا طریقہ اپنایا گیا، جس کے تحت تین قصابوں کو موقع پر ہی گرفتار کر لیا گیا، جبکہ ان کی دکانیں سیل کر کے ملزمان کو جیل منتقل کر دیا گیا ۔
ضلعی انتظامیہ کے مطابق عید کے قریب آتے ہی گرانفروشی کی روک تھام کے لیے کارروائیاں مزید سخت کر دی گئی ہیں، اور کسی کو بھی عوام کا استحصال کرنے کی اجازت نہیں دی جائے گی ۔
مقررہ نرخ نامہ پر عملدرآمد ہر صورت یقینی بنایا جائے گا، خلاف ورزی کرنے والوں کے خلاف سخت قانونی کارروائی جاری رہے گی ۔
انتظامیہ نے واضح کیا ہے کہ عید کے موقع پر نرخ نامہ کی خلاف ورزی کرنے والے دکانداروں کے خلاف بلا امتیاز کارروائی عمل میں لائی جائے گی تاکہ شہریوں کو ریلیف فراہم کیا جا سکے ۔
عوام سے اپیل کی گئی ہے کہ وہ گرانفروشی یا دیگر بے ضابطگیوں کی صورت میں فوری طور پر ڈپٹی کمشنر آفس کے کنٹرول روم یا پرائس مانیٹرنگ ڈیسک پر اپنی شکایات درج کروائیں ۔
