ڈھاکہ ٹیسٹ کے تیسرے روز پہلی اننگز میں پاکستان کی پوری ٹیم 386 رنز بناکر آؤٹ ہوگئی، بنگلا دیش نے دوسری اننگز میں بغیر کسی نقصان کے 7 رنز بنالیے، جس کے بعد میزبان ٹیم کی مجموعی برتری 34 رنز ہو گئی ۔
پاکستان اور بنگلادیش کے درمیان ڈھاکہ ٹیسٹ میں قومی ٹیم نے اپنی پہلی اننگز کا آغاز ایک وکٹ پر 179 رنز سے کیا، اپنے پہلے ٹیسٹ میں سنچری بنانے والے اذان اویس پہلے ہی سیشن میں 103 رنز بنا کر آؤٹ ہوگئے ۔
اذان اویس کیرئیر کے پہلے ٹیسٹ میں سنچری بنانے والے پاکستان کے 14ویں بیٹر بن گئے، جنہوں نے 153 گیندوں پر 14 چوکوں کی مدد سے سنچری مکمل کی ۔
اس کے بعد کپتان شان مسعود 9 رنز بنا کر آؤٹ ہوگئے، پھر سعود شکیل صفر پر آؤٹ ہوئے،اس کے علاوہ پاکستان کےعبداللہ فضل نے بھی کیرئیر کے پہلے ہی ٹیسٹ میں 60 رنز بنائے ۔
اس موقع پر سلمان آغا اور محمد رضوان نے ٹیم کو سہارا دینے کی کوشش کی تاہم وہ دونوں بھی بالترتیب 58 اور 59 رنز بنا کر آؤٹ ہوگئے،پاکستان کی پوری ٹیم 386 رنز بناکر آؤٹ ہوئی، یو ں اسے 27 رنز خسارے کا سامنا تھا ۔
نگلادیش کی جانب سے مہدی حسن 5 ، تیج الاسلام اور تسکین احمد نے 2،2 وکٹیں حاصل کیں ۔
بنگلادیش کی ٹیم پہلی اننگز میں 413 رنز پر آؤٹ ہوگئی تھی، نجم الحسن شانتو 101، مومن الحق 91 اور مشفیق الرحیم 71 رنز بنا کر نمایاں رہے تھے ۔
پاکستان کے محمد عباس نے 5 اور شاہین آفریدی نے 3 وکٹیں حاصل کیں جبکہ نعمان علی اور حسن علی نے ایک، ایک کھلاڑی کو آؤٹ کیا تھا ۔
