وزیراعلیٰ پنجاب مریم نواز سے گورنر پنجاب سردار سلیم حیدر خان نے ملاقات کی۔
جاتی امرا میں ہونے والی ملاقات میں مریم نواز نے نو منتخب گورنر پنجاب سردار سلیم حیدر کو عہدہ سنبھالنے پر مبارکباد دی۔ اس کے ساتھ ساتھ ملاقات میں صوبے کی ترقی کے لیے مختلف اہم امور پر تبادلہ خیال کیا گیا۔ دونوں رہنماؤں نے پنجاب کی بہتری، پائیدار ترقی اور شہریوں کے معیار زندگی کے لیے مل کر کام کرنے کے عزم کا اظہار کیا۔
ملاقات میں اقتصادی ترقی، گورننس، تعلیم، صحت کی سہولیات، امن و امان اور موسمیاتی تبدیلی سمیت دیگر اہم امور پر تبادلہ خیال کیا گیا۔ جبکہ پنجاب کے عوام کی فلاح و بہبود کے لیے مل کر کام کرنے کے عزم کا اعادہ کیا گیا۔ وزیراعلیٰ پنجاب مریم نواز نے کہا کہ ہر آئینی عہدے کا احترام ہے، صوبے میں قانون کی حکمرانی ہوگی۔ گورنر ایک آئینی عہدہ ہے جو صوبوں اور وفاق کے درمیان رابطے کا ذریعہ ہے۔ بے نظیر انکم سپورٹ پروگرام (BISP) کو صوبے بھر میں مزید موثر بنایا جا رہا ہے۔
انہوں نے مزید کہا کہ پنجاب میں تعلیم، صحت، روڈ انفراسٹرکچر اور انفارمیشن ٹیکنالوجی کے بہت سے منصوبے شروع کیے گئے ہیں اور محروم طبقات کی زندگیوں کو آسان بنانے کے لیے سماجی تحفظ کے خصوصی پروگرام شروع کیے گئے ہیں۔ اس موقع پر گورنر پنجاب سردار سلیم حیدر خان نے کہا۔ صوبے کے عوام کو ریلیف دینے کی ہر ممکن کوشش کی جائے گی۔ صوبے میں آئین و قانون کے نفاذ کو یقینی بنانے کے لیے حکومت کو گورنر ہاؤس سے مکمل تعاون حاصل ہوگا۔
