اسلام آباد میں وفاقی تحقیقاتی ادارے (ایف آئی اے) نے سی ڈی اے کے سرکاری ڈیزل کی چوری اور غیر قانونی فروخت میں ملوث ایک گروہ کے خلاف بڑی کارروائی کرتے ہوئے ایک ملزم کو گرفتار کر لیا جبکہ اس کا ساتھی موقع سے فرار ہو گیا۔
ایف آئی اے کے مطابق مقدمہ نمبر 11/2026 مورخہ 7 اپریل 2026 اسسٹنٹ کمشنر اسلام آباد محمد علی کی رپورٹ پر درج کیا گیا۔ خفیہ اطلاع ملی تھی کہ سرکاری ڈیزل چوری کر کے نجی افراد کو فروخت کیا جا رہا ہے۔
کارروائی کے دوران ایف آئی اے ٹیم نے کشمیر ہائی وے کے قریب ایم پی او آفس H-10/3 کے علاقے میں چھاپہ مارا۔ ٹریپ آپریشن کے دوران 5000 روپے کا نشان زدہ نوٹ استعمال کیا گیا جو بعد ازاں ملزم منور شاہ کی جیب سے برآمد ہوا۔
چھاپے کے دوران ایک ڈیزل سے بھرا کنٹینر اور متعلقہ ریکارڈ بھی قبضے میں لے لیا گیا۔ ابتدائی تفتیش میں گرفتار ملزم نے اعتراف کیا کہ وہ اپنے ساتھی رب نواز، جو ایک پرائیویٹ گارڈ ہے، کے ساتھ مل کر ٹرکوں سے ڈیزل چوری کر کے فروخت کرتا تھا۔
ایف آئی اے نے منور شاہ کو گرفتار کر لیا ہے جبکہ رب نواز کی گرفتاری کے لیے چھاپے جاری ہیں۔ مقدمہ پاکستان پینل کوڈ اور انسداد بدعنوانی ایکٹ کے تحت درج کر لیا گیا ہے۔ حکام کا کہنا ہے کہ سرکاری وسائل کے غلط استعمال کے خلاف کارروائیاں مزید سخت کی جائیں گی اور کیس میں مزید انکشافات بھی متوقع ہیں۔
