الیکشن کمیشن آزاد جموں و کشمیر کا ایک اہم اجلاس چیف الیکشن کمشنر کے دفتر میں منعقد ہوا جس میں انتخابی فہرستوں کی نظرثانی، ترمیم اور تصحیح کے جاری شیڈول کا تفصیلی جائزہ لیا گیا۔ اجلاس میں ممبر الیکشن کمیشن سید نظیرالحسن گیلانی، سیکرٹری الیکشن کمیشن راجہ محمد شکیل خان، کمشنر بلدیات راجہ راشد محمود اور دیگر اعلیٰ حکام نے شرکت کی۔
تمام امور پر غور کے بعد کمیشن نے متفقہ طور پر فیصلہ کیا کہ موجودہ شیڈول میں کسی قسم کی مزید توسیع نہیں کی جائے گی۔ کمیشن نے واضح کیا کہ آئینی تقاضوں کے مطابق انتخابات کو مقررہ وقت پر مکمل کرنا اس کی بنیادی ذمہ داری ہے۔
اجلاس میں یہ بھی بتایا گیا کہ اس سے قبل دو مرتبہ شیڈول میں توسیع کی جا چکی ہے تاکہ سیاسی جماعتوں اور عوام کو انتخابی فہرستوں میں اندراج، اعتراضات اور تصحیح کے لیے مناسب موقع فراہم کیا جا سکے۔
الیکشن کمیشن نے کہا کہ مزید تاخیر انتخابی عمل کی بروقت تکمیل میں رکاوٹ بن سکتی ہے اور آئینی تقاضوں کی خلاف ورزی کا سبب بھی بن سکتی ہے، اس لیے اب شیڈول پر سختی سے عمل درآمد کیا جائے گا۔
کمیشن نے اپنے عزم کا اعادہ کیا کہ آزاد، منصفانہ اور شفاف انتخابات کا انعقاد ہر صورت یقینی بنایا جائے گا اور تمام متعلقہ اداروں، سیاسی جماعتوں اور عوام سے اپیل کی کہ وہ جاری شیڈول کی پابندی کریں اور انتخابی عمل کی تکمیل میں تعاون کریں۔
