وزیراعلیٰ پنجاب مریم نواز شریف کی زیرصدارت ایک اہم اجلاس منعقد ہوا جس میں صوبے بھر میں جاری اور مجوزہ بڑے روڈ پراجیکٹس کا تفصیلی جائزہ لیا گیا اور متعدد اہم منصوبوں کی منظوری دی گئی۔
راولپنڈی میں سگنل فری کوریڈور پراجیکٹ پر پیشرفت کا جائزہ لیتے ہوئے بتایا گیا کہ منصوبے کے تحت سات انڈر پاسز اور ایک اوورہیڈ برج تعمیر کیا جائے گا۔ وزیراعلیٰ مریم نواز شریف نے ملتان وہاڑی روڈ سمیت دیگر جاری منصوبوں کی ہفتہ وار رپورٹ طلب کرتے ہوئے ہدایت کی کہ تمام منصوبوں کی بروقت تکمیل ہر صورت یقینی بنائی جائے۔
اجلاس میں بریفنگ دیتے ہوئے سیکرٹری تعمیرات و مواصلات راجہ جہانگیر انور نے بتایا کہ پنجاب میں روڈز سیکٹر کے مجموعی طور پر 2143 منصوبے جاری ہیں جن میں سے 258 زیر تکمیل ہیں۔ وزیراعلیٰ کے خصوصی اقدامات کے تحت جاری 133 منصوبوں اور دیگر 125 سکیموں کا بھی جائزہ لیا گیا۔
بریفنگ میں بتایا گیا کہ روڈ بحالی پروگرام کے پہلے مرحلے کی 85 سکیموں میں سے 38 مکمل جبکہ 47 پر کام جاری ہے، جبکہ دوسرے مرحلے میں شامل 41 سکیموں میں سے 18 مکمل اور 25 زیر تعمیر ہیں۔ وزیراعلیٰ نے ہدایت کی کہ روڈز سیکٹر کے تمام منصوبے 30 جون تک مکمل کیے جائیں۔ صوبے کے مختلف شہروں میں جاری 462 سکیموں میں سے 376 مکمل ہو چکی ہیں جب کہ 86 پر کام جاری ہے۔ لاہور ٹورازم ہائی وے منصوبے کا تصویری جائزہ بھی پیش کیا گیا جس پر وزیراعلیٰ نے شجرکاری کو یقینی بنانے کی ہدایت کی۔
وزیراعلیٰ مریم نواز شریف نے کہا کہ پنجاب کی تاریخ میں پہلی بار 12 ہزار کلومیٹر سے زائد سڑکوں کی تعمیر و مرمت کی گئی ہے اور پہلی مرتبہ دیہی علاقوں کی رابطہ سڑکوں پر خصوصی توجہ دی جا رہی ہے۔ انہوں نے کہا کہ معیاری روڈ انفراسٹرکچر سے کھیتوں سے منڈیوں اور کارخانوں سے مارکیٹ تک رسائی آسان ہوگی، جبکہ مساوی ترقی اور خوشحالی کے لیے ہر شہر اور ہر گاؤں کی سڑک کی تعمیر ناگزیر ہے۔
