مظفرآباد: وزیراعظم آزاد کشمیر فیصل ممتاز راٹھور نے چڑی کوٹ سیکٹر میں پاک فوج کے جوانوں کے ساتھ عیدالاضحیٰ منائی اور ملکی سلامتی کے لیے ان کی قربانیوں کو خراجِ تحسین پیش کیا۔
اس موقع پر وزیراعظم نے پاک فوج کے جوانوں کے بلند حوصلے اور ملکی دفاع کے لیے ان کی خدمات کو قومی فخر قرار دیا۔
انہوں نے کہا کہ معرکۂ حق اور آپریشن بنیانِ مرصوص میں پاک افواج کی تاریخی کامیابی دشمن کے لیے واضح پیغام ہے کہ پاکستان کا دفاع ناقابلِ تسخیر ہے۔
وزیراعظم آزاد کشمیر نے کہا کہ پوری قوم پاک فوج کے جذبۂ ایثار اور جرات پر فخر کرتی ہے اور یہ قربانیاں ملک کے استحکام کی ضمانت ہیں۔
انہوں نے مزید کہا کہ کشمیری عوام کی آزادی کی جدوجہد ہر صورت جاری رہے گی اور وہ وقت دور نہیں جب مقبوضہ کشمیر میں آزادی کا سورج طلوع ہوگا۔
